2Pe 3 | KYG | STEP | Nahau'niya vaya'nimogitapae, hu'na, ago afi'naya gee'mo halate alagepa lapakesafati'mo mago'e hutapa lapakesamo afisayafe'mo ali'na he ti'na lapatesuvafe'mo hogote avo'mo kaete'nae'mo hemenimo halate henaga avo'mo nekaove.

2 Peter 3

Ala kava ne'mo halate eminegaiye, huno hu'niya gemae

1 Nahau'niya vaya'nimogitapae, hu'na, ago afi'naya gee'mo halate alagepa lapakesafati'mo mago'e hutapa lapakesamo afisayafe'mo ali'na he ti'na lapatesuvafe'mo hogote avo'mo kaete'nae'mo hemenimo halate henaga avo'mo nekaove. 2 Lapakaemo akeya'vilaga apaote vaya'mogi Gotitegati gemo alini e'a ae'a hakalo hu'a hapa nepaiya vaya'mogi hu'naya ge'e Ala kava ne'mo lagufamo alino katino nelateya vekamo'a apa vaya'amogita'e'mo hutae'mo, ina kava'mo hiyo, huta hu'nona geti'e'mo halate mago'e hutapa lapakesamo afisayafe'mo mani avo'mo nekaove. 3 Hogotetapa mani gemo alagepa hutapa afiyo. Mago vaya'mogi, ina agufa gemo hane'niye, hu'a hute'a hu'a faipa hu'a atesaya vaya'mo henaga'amo hano hugefe hisiya afina'mo afole aite'a apakufamo'mo hau'niya kava'mo akame hugae. 4 Apakaemo, agaemo emi'negauve, huno hu'niyana hemenimo haiyate ne'maiye. Ma mopamo alo hu'niya afinateti'mo muki ya'amo afa'a haneme haneme eno hane'nige'a afotimogi agete'a falitageno hemeni'e'mo magoke agufa yake'mo hane'niye, hu'a hugae. 5 Hu'a hugaya'monanafa akeya'vilaga Goti'a, afole aino, huno hu'nigeno ma mopa'e koku'na'e'mo afa yateti'mo afole ai'niye. Mopamo anipati'mo afole ai'nigeno solovala ani'mo'a faino ku aino ate'nigeno mopamo folagapi'mo hane'niye. Hane'niya mopamo hane'nigeno ani'mo'a henaga'amo ago aeno ati kae'nigeno atafa mopamo ago hano hu'niye. Ani vaya'mogimo mani kavafe'mo apakesamo afisayafe'mo ohapau'nige'a apaulagamo fali kae'nige'a no'agae. 7 Ina kava'mo huno Goti'a ma mopa'e koku'na'efe'mo, afa'a haneno, huno hu'nigeno hane'niyanageno atamo'a leno asaga lisiyafe'mo afa'a hane'niye. Goti'a yagaino ate'nigeno haneme haneme ne'eyanageno Goti'a agaefe'mo mono nosaya vaya'aina agoti huno apateteno alino apago'ya lagauno apatalegaiye. 8 Nahau'niya vaya'nimogitapae, hu'na, Goti aulagale'mo magoke afina'mo vani tauseni'a kafugagana huno hane'neno vani tauseni'a kafugamo'mo magoke afinakana huno hane'niye. Ani kavatefe'mo lapake okanino. 9 Mago vaya'mogi, Ala kava nefe'mo hu'apae'mo, huguve, huno hu'niya kava'mo hisiyafe'mo lagava maime maime ne'viye, hu'a nehaya'monanafa huguve, huno hu'niya kava'mo hisiyafe'mo lagava ne'maiye. Alino lago'ya lagauno latalesiyafe'mo ohau'niya'monanafa muki'amogitamo laipamo alita afe lesunafeke'mo hau'nigeno'ae'mo lagava ne'maiye.

10 Kumaya vaya'mogimo kava no'yagaiya afina'mo ne'aya kava huno Ala kava ne'mo afina'amo afole aisigeno'ae'mo lusi kava huno avamusa gemo'mo nehisigeno'ae'mo koku'na'mo alagi uno lageso hugiye. Muki ma mopa'e muki ma mopafi'mo hane'niya ya'e'mo atamo'mo leno asagalino hano hugiye. 11 Muki ya'amo alagi hano hugiya'mofe'mo hemenimo lapakaemo haiya agufa vaya'mo maisaya kava'mo hane'niye. Lapaote kava'mo nehutapa Gotifeke'mo mono hiyo. 12 Muki ya'amo ata lege koku'na'mo ata lege huno leno asagalino hano hugiyanagi Ala kava ne'mo afinafe'mo agava mai'netapa malage huno afole aisiyafe'mo alagepa kava'mo hiyo. 13 Hano hugiya'monanafa Goti'a ali'na afole ai'na ategauve, huno ago hu male'niya gemo afole aisigeno'ae'mo fatago kava'ageke'mo hanesiya saufa koku'na'e saufa mopa'e'mo afole aisiyafe'mo agava ne'maune.

14 Nahau'niya vaya'nimogitapae, hu'na, afole aigiya'mofe'mo agava mai'netapae'mo hosu kavatapimo ohanesigetapa vai'mo o'alitapa agae'e'mo alagepa hutapa magokepi lokaeta mai'nisageno emineno lapakesiyafe'mo lapayamukiki hiyo. 15 Ala kava ne'mo'a lagava mai'niyanageno muki'amogita lagufamo alino katino lategaiye, huta lapakesamo afiyo. Lahau'niya konagatimo Polo'mo Goti'a ami'niya ya'mo ageteno afi'niya ge'aleti'mo ani kavatefe'mo lapakaefe'mo avo'mo kae'niye. 16 Agaemo muki kae'niya avo'amo ani kavafeke'mo kae'niye. Mago avo'mo kae male'niya gemo aepa'amo afisayafe'mo kana hu'niye. Kana hu'nige'a alagepa hu'a afite'a ali'a lokiya no'vaiya vaya'mogimo ali'a afe le'a alino apago'ya lagauno apatalesiya agufa kavake'mo ali'a afole ai'a ne'atae. Ani kava hu'a muki gemo Goti mukufi'mo avo'mo kae male'naya gee'mo hosu ge hu'a ali'a afe nelae. 17 Nahau'niya vaya'nimogitapae, hu'na, mani kavafe'mo ava gemo hogotetapa ago afi'naya'mofe'mo ehetapiye. Fiku yanagetapa ke'aepa gemo amagi'a ne'atalaya vaya'ai ge'apimo afitetapa atafautapa alagi hu'nayategati'mo ataleta asagauta aigayanagi. 18 Ani kava'mo osutapa Ala kava netimo lagufamo alino katino nelateya vekatimo Yesu Kalaisi'a fiku lapa maeno lapami'niya kavafeke'mo mago'e hutapa lapakesa afita fatago hutetapa Kalaisife'mo mago'e hutapa lapakesamo afitetapa ageta aeto hutetapae'mo kosita alopa vaya'mo maiyo. Ha le konali ya'amo hemenimo hane'niyanageno muki afina'e'mo hanege hanege huno haneno. He, lama ge.